Nagtanyag og Php50,000 nga ganti si City Councilor Jason Chad Ayala alang sa bisan kinsa nga makahatag og impormasyon o makatabang sa pagdakop sa suspetsado sa linuog nga paglugos ug pagpatay sa usa ka 9-anyos nga batang babaye didto sa sitio Encalbog barangay Can-ayan Malaybalay City.
Ang maong tanyag gihimo sa konsehal aron mapadali ang pagkab-ot sa hustisya alang sa biktima nga giingong gipailalom sa torture sa wala pa kini gilabay sulod sa sako. Sa pagkakaron, gipahigayon na ang usa ka hot pursuit operation sa mga awtoridad batok sa suspetsado.
Base sa impormasyon gikan sa kapulisan ug sa pakig-alayon ni Mayor Ricky James Balansag sa Lantapan, ang suspetsado giila nga residente sa Alanib, Lantapan. Nasayran usab nga ang maong indibidwal duna nay giatubang nga kaso nga murder kaniadto sa lungsod sa Lantapan.
Nanawagan ang konsehal sa tibuok katawhan sa Malaybalay nga makigtambayayong ug i-report dayon sa labing duol nga police station kung adunay makit-an nga kadudahang lihok o impormasyon bahin sa nahimutangan sa maong tawo. Ang hulagway sa suspetsado gi-post na usab sa social media aron mas daling mailhan sa publiko
Kahibaloang gikataho nga missing ang maong bata niadtong Martes Abril 14, ug sa ulahi napalgang patay na sa pamilya Abril 17, 2026
Photo Courtesy: Jason Chad Ayala
