Gihatagan og kahigayonan ni Cebu City Mayor Nestor Archival ang mga sidewalk vendors sa dakbayan nga magpadayon sa ilang pagpanginabuhi, basta magpabiling hapsay ug dili makabalda sa agianan sa mga pedestrians.
Sa iyang inspeksyon sa palibot sa North Bus Terminal ug Kaohsiung Street gisuta sa mayor ang kahimtang sa mga nagbaligya ug giawhag sila nga sundon ang hustong pagbutang sa ilang pwesto.
Miingon siya nga suportado sa siyudad ang ilang panginabuhi, apan kinahanglan dili masamok ang mga molabay sa sidewalk.
Mipadayon usab ang inspeksyon ngadto sa B. Rodriguez Street aron masiguro nga parehas nga mga patakaran ang gituman sa tanang vendors.
Matod pa ni Archival, bisan adunay mga nakasunod na sa gitakdang boundary lines, adunay gihapon kinahanglan nga ayuhon aron masiguro ang hapsay nga dagan sa mga tawo.
Gawas sa kahimtang sa vendors, namatikdan usab sa mayor ang pipila ka peligro sa imprastraktura sama sa mga konkretong pedestal nga hinungdan pagkadagma sa mga pedestrians.
Gimandoan usab ni Archival ang pagbutang og dugang streetlights sa atubangan sa APM Mall human makadungog sa kabalaka sa mga vendors bahin sa kakulang sa kahayag sa gabii.
Gipasabot niya nga importante kini alang sa kaluwasan sa mga mamaligya ug commuters.
Samtang, nagpasalamat ang mga vendors sa higayon nga gihatag sa siyudad ug misaad nga magpabiling limpyo, organisado, ug dili makababag sa agianan sa publiko.
Photo credits: Cebu City PIO
