Nawad-an og trabaho ang daghang empleyado sa Iran tungod sa padayong kagubot tali sa Iran, Estados Unidos, ug Israel nga nagsugod niadtong Pebrero 28, 2026.
Sumala sa mga report grabeng nakaapekto ang giyera sa ekonomiya sa Iran tungod sa pagsira o paghinay sa operasyon sa dagkong industriya, nga miresulta sa paghunong sa trabaho sa daghang kontraktwal ug inadlawang trabahante.
Lakip sa labing naapektuhan mao ang petrochemical sector sa Mahshahr ug South Pars, ingon man ang mga pabrika sa asero, human sa mga airstrike nga miresulta sa paghunong sa produksyon.
Gibanabanang kapin 30,000 ka trabahante sa petrochemical industry ang naapektuhan. Dako usab ang epekto sa internet restrictions o internet blackout nga gipatuman, diin liboan ka freelancer, programmer, ug content creators ang napugos nga mohunong sa ilang trabaho.
Tungod niini, gibanabana nga niminus ang ekonomiya sa nasod ug posibleng molapas sa 10% ang pagkunhod sa GDP, samtang gilauman usab nga moabot sa bilyon-bilyong dolyar ang kadaot sa ekonomiya.
Dugang pa, ang posibleng pagkaapektado sa Strait of Hormuz ug ang paglangan sa suplay sa krudo nagpasamot sa kakulang sa suplay sa mga nag-unang palaliton, hinungdan sa pagsaka sa presyo ug paggrabi sa kahimtang sa mga ordinaryong Iranian.
Photo Courtesy: Reuters
