Gibutyag ni Tristan Edrian Licudan, franchise owner sa Sea Oil Kidapawan City ug representante sa Subrio Technik Resources Incorporated, nga adunay igo nga suplay sa gasolina ang ilang kompanya hangtod sa bulan sa Mayo karong tuiga bisan pa sa nagpadayong disruption sa fuel supply.
Matod pa ni Licudan, giabisohan na sila sa Sea Oil Company sukad pa kaniadtong Marso nga ang ilang kasamtangang suplay igo pa hangtod Mayo.
Bisan pa niini, wala pa sila makadawat og bag-ong update gikan sa kompanya kalabot sa posibleng pagdugang sa suplay pinaagi sa ilang negosasyon sa spot market.
Dugang pa niini nga hangtod karon, wala pay klaro kung molapas ba sa forecast nga suplay hangtod Mayo ang ilang mahatag sa merkado.
Bisan pa sa kakulang sa bag-ong impormasyon, gipahayag ni Licudan nga wala pay natalang kakulang sa suplay sa mga estasyon sa Sea Oil sa Kidapawan City.
Dugang pa nga bisan sa panahon nga miusbaw ang presyo sa petrolyo ug adunay mga report sa hoarding sa unang semana, nakahatag gihapon sila og igo nga suplay sa ilang mga customer.
