Mokabat sa Php2-M alang sa mga mananaog sa tanang kategorya sa usa sa pinakadakong tennis tournament sa nasud nga gi-organisa sa Gentry Timepieces, uban sa suporta sa Palawan Pay Express.
Gipirmahan usab ang Memorandum of Agreement tali sa duha ka grupo isip pormal nga pagsugod sa maong torneyo, diin gipaila-ila ang mga nag-unang tennis players sa Pilipinas sama nila AJ Lim ug John Benedict Aguilar nga andam na sa maong torneyo karong Mayo.
Sumala ni coach Bobby Mangunay, nga usa sa nagtudlo sa duha ka atleta, magsugod ang qualifying round sa Mayo 22 hangtod 23 sa kasamtangang tuig.
Matod pa ni Lim, nga usa sa top A players sa nasud, paningkamotan niini nga mapataas pa ang lebel sa iyang dula ug mas mapalig-on ang iyang kumpyansa sa pagsalmot sa Palawan Open diin siya usab giila nga number one player.
Dugang pa, mosalmot usab sa maong torneyo ang tulo ka mga top players gikan sa India, nga gilauman maghatag og mas kusog nga kompetisyon sa international level.
