Gisentensyahan sa usa ka korte sa Kenya ang usa ka Chinese national og 12 ka bulan nga pagkabilanggo ug multa nga 1 milyon shillings ($7,746) human nasakpan sa pagsulay sa pag-smuggle og “live ants” pa gawas sa nasod.
Nasakmit si Zhang Kequn sa Nairobi International Airport niadtong miaging bulan nga adunay kapin 2,200 live garden ants sa iyang bagahe.
Sumala sa korte, ang higpit nga silot gikinahanglan isip pagpugong sa nagkadaghang kaso sa ant trafficking sa Kenya.
Matod sa mga imbestigador, ang maong mga amigas gibaligya sa mga merkado sa ubang nasod, lakip na ang China, diin adunay mga collectors nga nagbayad og dako nga kantidad aron magpabilin ug magtuon sa mga ant colonies sa sulod sa transparent containers nga gitawag og formicariums.
Si Zhang una nga mi-deny sa kaso apan sa ulahi miangkon sa sala. Nagplano usab ang iyang abogado nga mo-apelar sa desisyon sa korte.
Usa ka Kenyan national, si Charles Mwangi, kauban usab sa kaso ug gipasanginlang nag-supply sa mga amigas kang Zhang apan miangkon nga inosente ug temporaryong nakagawas human makapiyansa.
Sa miaging tuig, upat ka lalaki usab ang gisentensyahan og multa sa susamang kaso sa ant trafficking, nga giingong nagpakita sa pagbalhin sa wildlife smuggling gikan sa elephant ivory ngadto sa ubang klase sa wildlife species.
Photo Courtesy: The New York Times
