Gitun-an sa gobyerno ang posibleng tabang alang sa mga middle-income earners nga apektado sa padayong pagsaka sa presyo sa gasolina ug palaliton.
Matod ni Finance Undersecretary Karlo Fermin Adriano, usa sa mga gituki sulod sa UPLIFT Committee mao ang posibilidad nga lugwayan ang diskwento sa gasolina dili lang sa mga public utility vehicles kon dili lakip na sa mga pribadong motorista.
Ang UPLIFT Committee, nga gimugna ubos sa Executive Order No. 110 (2026), mao ang nanguna nga tubag sa gobyerno sa krisis sa enerhiya tungod sa mga tensyon sa Middle East.
Tumong sa komite nga mamentinar ang stable nga presyo sa gasolina ug pagkaon, ug maghatag tabang sa lainlaing sektor sama sa mga mag-uuma, mangingisda, ug mga trabahador sa transportasyon pinaagi sa gipunting nga mga subsidyo ug mga interbensyon.
Matod sa DOF, giila sa gobyerno nga dili lang mga drayber sa pampublikong sakyanan ang apektado sa kamahal sa presyo sa gasolina, apil na ang mga pribadong motorista.
Photo Courtesy: Department of Finance
