Nagpahigayon og surprisang price monitoring activity ang Department of Trade and Industry (DTI) General Santos City pinaagi sa Consumer Protection Division niadtong April 14, 2026.
Tumong sa maong operasyon nga masiguro ang husto ug patas nga presyo sa mga Basic Necessities and Prime Commodities (BNPC) sa dakbayan. Subay sa report, upat ka dagkong establisyemento sa Barangay Calumpang ug Barangay San Isidro sa dakbayan ang gisusi sa mga otoridad.
Base sa nakolektang datos, nagpabiling “stable” o walay dakong pagsaka ang presyo sa mga batakang palitonon sa maong mga dapit. Gihimo kini aron malikayan ang pagpahimulos o dili makatarunganong pagsaka sa presyo sa mga negosyante.
Ang maong lakang kabahin sa mandato sa DTI sa pagpatunhay sa makiangayong presyo ug pagsiguro sa kalidad ug seguridad sa mga produkto.
Giawhag usab sa DTI ang publiko nga kanunay magbinantayon ug i-report dayon sa ilang buhatan kung adunay mabantayan nga mga tindahan nga wala nagsunod sa saktong presyo o nagbaligya og mga substandard nga produkto.
Photo Courtesy: DTI-GENSAN
