Boluntaryong misurender ang usa ka ranking member sa nabungkag nga Communist Terrorist Group (CTG) pinaagi sa gihimong intelligence-driven operation sa hiniusang police ug intelligence units sa Bukidnon niadtong Abril 14, 2026.
Maoy nanguna nga yunit sa operasyon ang mga personahe sa 2nd Bukidnon Provincial Mobile Force Company (PMFC), sa pagsurender ni alyas “Santo,” kanhi Vice Commanding Officer sa Front Operational Command (FOC) sa nabungkag nga Guerilla Front 6 (Coy Thunder), Sub-Regional Committee 2, North Central Mindanao Regional Committee (NCMRC).
Gihimo Ang operasyon uban sa koordinasyon sa San Fernando Municipal Police Station, Regional Intelligence Unit 10, Bukidnon Provincial Intelligence Unit, Bukidnon Provincial Intelligence Team, ug 13th Special Action Company sa 1st Special Action Battalion, PNP-Special Action Force, uban sa intelligence support gikan sa Mindanao Area Police Intelligence Office (MAPIO).
Atol sa inisyal nga debriefing, gibutyag sa kanhing rebelde ang iyang pag-apil sa daghang mga mapintas nga kalihokan nga may kalabotan sa CTG. Apil na niini ang pag-raid sa usa ka security agency nga nadestino sa plantasyon sa Del Monte Philippines sa Quezon, Bukidnon niadtong Oktubre 8, 2017, diin dili mominos sa 15 ka mga high-powered firearms ang nasakmit.
Dugang niya nga gibutyag ang iyang pag-apil sa pagdagit sa duha ka mga sundalo nga walay armas ug nagsul-ob og yano nga sinina samtang nagbiyahe sakay sa motorsiklo ug nagpahigayon sa mga katungdanan sa administrasyon sa Impasugong, Bukidnon niadtong Agosto 22, 2014.
Nipadayag ang 30-anyos nga kanhi CTG member, residente sa Barangay Nam-nam, San Fernando, sa iyang tinguha nga mahibalik sa sabakan sa balaod ug magpuyo sa malinawong kinabuhi uban sa iyang pamilya kinsa anaa karon sa kustodiya sa 2nd Bukidnon PMFC alang sa tukmang debriefing ug profiling.
Samtang, giproseso na ang gikinahanglang dokumentasyon para sa iyang pagpalista sa Enhanced Comprehensive Local Integration Program (E-CLIP), usa ka inisyatiba sa gobyerno nga naghatag og tabang ug suporta sa mga kanhi rebelde samtang sila mibalik sa katilingban.
Photo Courtesy: 2nd Bukidnon PMFC
