Gipatuman karon sa Bureau of Fire Protection (BFP) sa probinsya sa Bukidnon ang mas strikto nga pag-deploy sa ilang mga fire truck isip tubag sa padayon nga pagsaka sa presyo sa krudo.
Sumala ni SFO1 Rene R. Rubillos, spokesperson sa BFP Bukidnon sa pakighinabi sa Juander Radyo Malaybalay nga, usa kini sa ilang mga pamaagi aron masiguro nga dili maapektohan ang ilang serbisyo sa pagtubag sa mga emerhensya taliwala sa krisis sa petrolyo.
Dugang pa, nga bisan pa man sa pagdoble o pagtriple sa presyo sa krudo, ang ilang budget nagpabilin nga mao ra gihapon, hinungdan nga kinahanglan silang mangita og paagi aron makadaginot.
Isip kabahin sa maong lakang, ang mga fire truck nga kaniadto kanunay makita sa mga kadalanan para sa “fire truck visibility” ug mga “recorida” o pagpahibalo sa publiko, naka-standby na lang karon sa ilang mga istasyon.
Gipasabot usab sa BFP nga ang mga hangyo gikan sa ubang ahensya sa gobyerno nga mogamit og fire truck alang sa mga aktibidad nga walay kalabutan sa sunog ang ipaubos na sa masusing assessment. Kon mapamatud-an nga gikinahanglan gayod ang fire truck, ang ahensya nga nanghangyo na ang moabaga sa gikinahanglang krudo o tubil.
Bisan pa man niining mga pagdaginot, gipaniguro ni Rubillos nga andam gihapon ang BFP Bukidnon sa pagtubag sa bisan unsang emerhensya sa tibuok probinsya.
Gihatagan niya og gibug-aton nga ang maong sakripisyo gihimo aron dili mababagan ang ilang nag-unang misyon nga mao ang pagluwas sa kinabuhi ug kabtangan.
Photo Courtesy: BFP – Bukidnon
