Hugot nga gipahimangnoan sa PhilHealth northern Mindanao region 10 ang tanang accredited healthcare facilities nga tumanon ang ilang obligasyon ubos sa programang “Yakap” o PhilHealth Konsulta, aron malikayan ang pagkatangtang sa ilang akreditasyon.
Sa gipahigayong media forum kauban ang Juander Radyo Malaybalay Abril 14, 2026, gipasabot ni Delio A. Aseron ll regional vice president Philheath region 10, nga ilahang gipatuman ang “three-strike policy” alang sa mga pasilidad nga mapamatud-an nga napakyas sa paghatag og saktong serbisyo ug tambal ngadto sa mga miyembro. Ang unang kalapasan makadawat og written warning, sundan sa final warning sa ikaduhang higayon, ug hingpit nga tanggalon ang akreditasyon sa ikatulo nga strike.
Kini nga lakang kabahin sa “Mutual Care Agreement” o ang gitawag nga “Blood Compact” tali sa PhilHealth facility ug sa miyembro. Ubos niini, obligado ang pasilidad nga mohatag sa gisaad nga mga tambal, konsultasyon, ug saktong giya sa doktor, samtang ang miyembro gikinahanglan usab nga regular nga magpa-checkup bisan pa og walay gibating sakit.
Tumong sa programang “Yakap” nga usbon ang mentalidad sa katawhan gikan sa pagtambal lamang kung masakiton na, ngadto sa paglikay sa sakit pinaagi sa preventive healthcare. Gihatagan og gibug-aton sa ahensya nga ang sayo nga pag-atiman sa mga “basic” nga balatian sama sa high blood ug diabetes makapugong sa mas grabe nga komplikasyon sama sa chronic kidney disease nga nagkinahanglan na og dialysis o transplant.
Kini nga inisyatiba nahiuyon sa “Rise 30 Mission” ni PhilHealth President RD Ledesma, nga nagtinguha sa paspas nga pagbayad sa mga partner facilities ug paghatag og patas nga serbisyo aron mabalik ang pagsalig sa mga miyembro ngadto sa ahensya
Photo Courtesy: PhilHealth
