Gipahibalo sa Department of Foreign Affairs (DFA) nga liboan ka mga Filipino seafarer ang na-stranded karon sa Strait of Hormuz samtang nagpadayon ang tensyon sa Middle East.
Matod ni Foreign Affairs Secretary Maria Theresa Lazaro, gibana-bana nga 4,862 ka Filipino seafarers ang nalakip sa 20,000 seafarers gikan sa nagkalain-laing nasod nga na-stranded sa vital route.
Kadaghanan usab sa mga barko nga na-stranded mao ang mga oil and gas tanker ug mga cargo ship nga dili makaagi tungod sa nagkagrabeng panagbangi sa rehiyon.
Nagkanayon ang DFA nga ang gobyerno padayon nga nakig-alayon sa mga nasud nga hingtungdan aron masiguro ang kaluwasan ug posible nga luwas nga paglihok sa mga barko nga adunay bandera sa Pilipinas.
Sumala sa datos, gikan sa naandan nga 3,000 ka mga barko nga moagi sa Strait of Hormuz kada bulan, nius-os kini ngadto sa 200 sa unang semana sa Abril tungod sa nagkagrabeng gubat.
Kahinumdoman nga ang Pilipinas nihimo na og diplomatic requests ngadto sa Iran nga tugotan ang pag-agi sa pipila ka mga barko sa nasud nga adunay sakay nga mga tripulante nga Pinoy. Bisan og wa pay konkretong kasabotan, ang DFA nipasalig nga nagpadayon ang ilang negosasyon sa Iran.
Photo Courtesy: TRT World
