Giduso ni Parañaque Rep. Brian Yamsuan ang usa ka balaodnon nga magpahamtang og mas bug-at nga silot batok sa hoarding, overpricing, ug uban pang ilegal nga kalihokan kalabot sa mga produktong petrolyo, lakip na ang pagkabilanggo hangtod sa 15 ka tuig. Ubos sa House Bill No. 8616, tumong sa sugyot nga panalipdan ang mga konsumidor batok sa mga negosyante nga nagpahimulos sa panahon sa krisis sa ekonomiya, sama sa karong pagsaka sa presyo sa lana, aron lang makakuha og dako nga ginansya.
Matod ni Yamsuan, dili angay pasagdan kining matang sa kahakog. Sumala pa sa magbabalaud, tinguha sa balaodnon nga mas pahugtan ang kasamtangang balaod. Naglaum usab siya nga molihok dayon ang Kongreso sa pagbalik sa sesyon sunod bulan aron mapasar ang balaodnon ug magsilbing pasidaan sa mga sige’g pahimulos sa kalisod sa katawhan matag higayon nga mosaka ang presyo sa lana.
Gipahayag ni Yamsuan kini nga panawagan dungan sa gipakusog nga kampanya sa Department of Energy batok sa fuel hoarding aron malikayan ang artipisyal nga kanihit nga mas makapasaka pa sa presyo sa gasolina ug diesel. Gipasabot ni Yamsuan nga karaan na ang kasamtangang Presidential Decree 1865 nga nag-amyenda sa Batas Pambansa Blg. 33, ug wala na kini magtakdo sa mga probisyon sa Downstream Oil Deregulation Law ug Price Act.
Ubos sa balaudnon, isaka ang kasamtangang silot nga pagkabilanggo gikan sa duha hangtod lima ka tuig ngadto na sa lima hangtod 15 ka tuig. Isaka usab ang multa gikan sa Php20,000–Php50,000 ngadto na sa Php50,000–Php300,000.
Lakip sa mga gidili nga buluhaton ang ilegal nga pamatigayon, adulteration o pagsagol sa produktong petrolyo, underfilling, hoarding, overpricing, ug maling paggamit sa alokasyon sa fuel, nga giisip nga mga hulga sa nasudnong seguridad ug interes sa publiko. Gihisgotan usab ni Yamsuan nga sa miaging bulan, nakadawat ang DOE og dili mominus sa 87-ka report bahin sa sobra nga pagsaka sa presyo sa lana ug nagpagula na og 55 ka show-cause orders batok sa mga gasolinahan.
Photo courtesy: Wikipedia
