Gipahibalo ni Pangulong Ferdinand Marcos Jr. ang pagsuspinde sa excise tax sa liquefied petroleum gas (LPG) ug kerosene, sugod niadtong Lunes, unang adlaw sa implementasyon sa balaod nga nagtugot kaniya sa pag-adjust sa buhis sa fuel tungod sa padayon nga pagsaka sa presyo sa lana.
Ubos sa iyang mando, gitangtang ang ₱3.36 kada kilo nga excise sa LPG ug ang ₱5.65 kada litro sa kerosene, nga maghatag og dako nga kahupayan sa gasto sa mga panimalay, ilabi na sa pagluto ug adlaw-adlaw nga panginahanglan.
Apan wala pa gihapon desisyon kung i-suspend ba usab ang excise sa diesel ug gasoline, nga gigamit sa publiko ug pribadong transportasyon.
Gisulti sa Presidente nga gi-usisa pa kini sa inter-agency meeting sa Unified Package for Livelihood, Industry, Food, and Transport (UPLIFT) committee.
Giingon usab sa Presidente nga bukas siya sa pagtuon sa mga proposal nga wagtangon ang 12% value-added tax (VAT) sa fuel, apan gipunting niya nga ang VAT importante sa pagpondo sa ayuda sa ubang sektor sa ekonomiya.
Matod sa Department of Finance, kon i-suspend ang fuel excise sa maong panahon, posibleng moresulta kini og kapin ₱136 bilyon nga kakulian sa kita sa gobyerno.
Gisugyot sa pipila ka mga mambabalaod nga i-refund o i-credit balik ang buhis nga nabayran na sa gasolina nga naa na sa stock karon. Samtang ang mga oil companies miingon nga ok ra sila ani nga idea, basta klaro ug tarong ang mga rules kung unsaon pagpatuman niini.
Ubos sa bag-ong balaod, ang suspension sa fuel excise mahimong molungtad hangtod tulo ka bulan, ug magdepende sa presyo sa Dubai crude oil kung ibalik ba dayon ang buhis o dili.
Photo Courtesy: INQUIRER.NET
