Nadakpan ang usa ka high value individual o HVI sa joint buy-bust operation nga gipahigayon sa City Drug Enforcement Unit (CDEU), Provincial Drug Enforcement Unit (PDEU) ug Philippine Drug Enforcement Agency o PDEA sa Barangay Cogon, Digos City.
Ang operasyon nahitabo sa Sitio Punta Biao, Purok Seaweeds, diin target ang suspetsadong giila nga si alyas “Tek,” nga giingong nagapamaligya og ilegal nga droga sa maong lugar.
Sa operasyon, narekober gikan sa suspek ang gibanabana nga 15.65 gramos sa gidudahang shabu nga nagkantidad og ₱108,120 base sa standard drug price. Nakuha usab ang usa ka .38 caliber revolver nga walay lisensya uban ang buhing bala.
Karon, anaa na sa kustodiya sa Digos City Police Station ang suspetsado samtang giandam ang kasong paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Illegal Possession of Firearms.
Padayon ang panawagan sa kapulisan sa publiko nga makigtambayayong sa pagbatok sa illegal nga droga pinaagi sa pagreport sa bisan unsang kahina-hinalang lihok sa ilang komunidad.
