Nag-agwanta sa taas nga pila, gabie palang hangtod kadlawon, nga mulinya ang mga Kagay-anon. Ulan-init giagwanta, dignidad bugti sa pipila ka kilo nga bugas nga ₱20/kilo. Kini nga kahimtang, gihulagway sa mga miyebro sa City Council nga dili makatao.
Busa, atol sa regular nga sesyon, giaprobahan ang gisugyot nga Resolution No. 2026-306 nga maghangyo sa National Food Authority (NFA) nga ipatuman ang barangay o cluster-based nga iskedyul alang sa direktang pagbaligya sa ₱20/kilo nga bugas sa dakbayan.
Tumong niini nga lakang nga maminusan ang taas nga linya sa mga mopalitay didto sa bodega sa NFA sa Baloy, Barangay Tablon, dungan sa tinguha nga mapatas-an ang inadlaw nga alokasyon sa bugas alang sa mga residente sa dakbayan.
Ang resolusyon gisugyot ni City Councilor Marlo Tabac, chairperson sa Committee on Barangay Affairs sa konseho, kinsa nipasabot sa kamahinungdanon sa usa ka hapsay ug epektibo nga sistema sa pag-apod-apod sa bugas sa NFA.
Samtang, gipahayag usab ni City Councilor George Christopher Goking, ang chairperson sa Committee on Trade and Commerce, nga naaprobahan na ang bodega sa NFA sa Barangay Patag isip usa ka distribution center aron makatabang sa pagpalapad sa mga dapit nga maabtan sa pag-apod-apod sa dakbayan.
Photo courtesy: NFA Misamis Oriental/ Facebook
