Nagpahayag si Franklin Dagcuta, presidente sa Rice Retailers Association sa Cagayan de Oro, nga posible alang sa national government ang pagpatuman sa tag-50 pesos kada kilo nga bugas, base sa naunang inisyatiba sa syudad.
Matod ni Dagcuta, napakita na sa Cagayan de Oro nga mahimo kini pinaagi sa programang “Princess Bea,” diin napamaligya ang bugas sa mas ubos nga presyo.
Apan, gibutang niya ang dakong pangutana kung mosugot ba ang mga importer sa bugas nga mokuha og gamay nga ginansya, ilabi na kung ipatuman kini sa tibuok nasud.
Gipasabot niya nga bisan posible ang implementasyon, importante gihapon nga tan-awon ang epekto niini sa supply chain ug sa mga negosyante nga apil sa pag apod-apod sa bugas.
Sa pagkakaron, padayon ang diskusyon sa proposal samtang nagtan-aw ang gobyerno sa paagi aron mapagaan ang gasto sa bugas alang sa mga konsumidor.
