Gipahayag sa Department of Energy (DOE) nga imposible na nga mobalik sa ₱60 kada litro ang presyo sa krudo ug gasolina tungod sa mga epekto sa giyera sa Middle East.
Sumala ni Energy Secretary Sharon Garin, ang mga structural damages sa mga oil-related facilities maoy usa sa mga rason niini, dungan sa kawalay kasiguruhan kon kanus-a mahuman ang gubat ug kon unsa kadugay ang gikinahanglan alang sa pag-ayo sa mga naguba nga pasilidad.
Gibutyag ni Garin nga kon milungtad lang unta og duha ka semana ang kagubot, dako pa ang posibilidad nga mobalik sa karaan nga presyo ang lana, apan tungod kay pipila na ka semana ang milabay, dili na mahimong paspas ang pag-ubos niini.
Taliwala niining dautang balita, gipasalig sa kalihim nga magpadayon ang kagamhanan sa paghatag og fuel subsidies alang sa mga drayber nga labing apektado sa taas nga presyo sa petrolyo.
Gawas niini, aduna pay laing mga programa nga ilusad ang gobyerno aron makonhuran ang kalisod sa mga motorista, lakip na ang paghatag og mga discounts alang sa mga drayber sa jeepney nga gilaumang mapahimuslan sulod sa tulo hangtod upat ka bulan.
