Nisaka ngadto sa 3.3% ang inflation rate sa Estados Unidos niadtong Marso, tungod sa pagsaka sa presyo sa enerhiya human sa giyera sa Iran, sumala sa datos sa US Bureau of Labor Statistics.
Gikan kini sa 2.4% nga inflation sa miaging bulan, samtang nitala usab og 21.2% nga pagsaka ang presyo sa gasolina gikan sa Pebrero hangtod Marso—ang kinadak-ang binulan nga pagsaka sukad pa niadtong 1967.
Anaa na sa $4.15 matag galon ang average nga presyo sa gasolina sa US, gikan sa halos $3 sa wala pa nibuto ang panagbangi sa Middle East.
Giduso ang pagsaka sa nagpadayong tensyon human bombahi sa US ug Israel ang Iran, nga gitubag usab sa Tehran pinaagi sa pagbabag sa Strait of Hormuz.
Sumala sa White House, nagpabiling lig-on ang ekonomiya ug lumalabay lamang ang epekto sa krisis. Apan, nagpahimatngon ang mga eksperto nga mamahimo pang mosamot ang sitwasyon.
“Sinugdanan pa lang kini,” matod ni economist Heather Long, kinsa nag-ingon nga posibleng mosaka pa ang presyo sa pagkaon, biyahe, ug shipping sa mosunod nga mga bulan.
Gibanabana nga moabot sa $350 matag panimalay ang dugang gasto sa mga Amerikano tungod sa pagsaka sa presyo sa lana.
Sa laing bahin, ninaog usab og 11% ang consumer sentiment, samtang gilauman nga malangan ang target sa Federal Reserve nga paubsan ngadto sa 2% ang inflation.
Photo courtesy: BBC
