Gipalapdan sa Bureau of Internal Revenue (BIR) ang listahan sa mga tambal nga dili sakop sa value-added tax (VAT), nga niabot na karon sa 2,263 ka matang.
Kini nga lakang subay sa direktiba ni Presidente Ferdinand R. Marcos Jr. aron himoong mas barato ug mas daling mabatonan ang healthcare alang sa tanang Pilipino.
Base sa Revenue Memorandum Circular No. 27-2026, nga gi-endorso sa Food and Drug Administration (FDA) ubos sa Department of Health, lakip sa mga VAT-exempt nga tambal ang mosunod:
- 702 ka tambal sa cancer
- 535 ka tambal sa hypertension (altapresyon)
- 327 ka tambal sa diabetes
- 300 ka tambal alang sa mental health
- 171 ka tambal sa high cholesterol
- 152 ka pagtambal sa sakit sa kidney
- 76 ka tambal sa tuberculosis (TB)
Ang circular gipatuman ubos sa TRAIN Law (Republic Act No. 10963) ug CREATE Act (Republic Act No. 11534). Sumala ni BIR Commissioner Charlito Martin R. Mendoza, gipaspasan sa ahensya ang review ug approval sa mga mekanismo aron maseguro ang dinaliang implementasyon sa mga benepisyo alang sa mga Pilipino.
Ubos sa pagdumala ni Finance Secretary Frederick D. Go, padayong nagtinabangay ang mga attached agencies aron mapatuman kini nga mga lakang.
Epektibo na dayon ang circular ug magpabilin kini hangtod nga adunay bag-ong update gikan sa FDA.
Photo courtesy: Pilipino Mirror
