Dako nga kalampusan ang natala sa Davao del Sur Police Provincial Office (DSPPO ) human masikop ang Top 1, Top 2 ug Top 3 Most Wanted Persons sa lebel probinsyal atol sa gipakusgan nga implementasyon sa Oplan Tugis.
Ang sunod-sunod nga manhunt operations nga gipangulohan ubos sa superbisyon ni PCOL Leo T. Ajero ug gipangulohan ni PLTCOL Franco R. Advincula, miresulta sa pagkadakop sa tulo ka high-value fugitives nga nag-atubang og kasong murder nga walay piyansa.
Una nga nasikop si alias “Wewel,” 38-anyos, bandang alas 4:45 sa hapon sa Sitio Kadlom, Barangay Kimlawis pinaagi sa warrant of arrest nga gi-isyu ni Judge Carfelita B. Cadiente-Flores sa Digos City.
Misunod ang pagdakop kang alias “Boy,” 65-anyos ug giila nga Top 1 Most Wanted Person, bandang alas 5:00 sa hapon sa Sitio Sixteen, Barangay Kimlawis, nga adunay kaparehong warrant alang sa kasong murder.
Sa ulahi, alas 5:20 sa hapon, nasikop usab si alias “Bobot,” 38-anyos, sa Sitio Kalo, Barangay Kimlawis, nga nag-atubang og daghang kaso sa murder ubos sa warrant nga gi-isyu ni Judge Carmelita Sarno Davin.
Ang tulo ka nadakpan gipahibalo sa ilang katungod ug karon anaa na sa kustodiya sa Kiblawan Municipal Police Station alang sa hustong dokumentasyon ug disposisyon.
Dugang pa, ilawom sa Oplan Tugis 2026-01, nakarekober usab ang mga operatiba og unom ka piraso sa marijuana duol sa pangpang sa Purok 8, Sitio 16, Barangay Kimlawis nga adunay gibanabang kantidad nga ₱1,200.
Sumala sa kapulisan, kabahin kini sa lima ka adlaw nga intensified operations batok sa mga wanted persons sa kabukiran sa Kiblawan, nga giubanan usab sa community engagement aron mapadayon ang kalinaw sa lugar.
Gidayeg ni Ajero ang mga operatiba tungod sa ilang propesyonalismo, koordinasyon ug dedikasyon sa pagpatuman sa misyon, ug gipasalig nga padayon ang kampanya aron mapaatubang sa balaod ang tanang mga wanted persons.
