Nagpagawas og isog nga pamahayag si Iran Parliament Speaker Mohammad Bagher Ghalibaf human kini mibalik sa Iran gikan sa Pakistan, diin siya ang nangulo sa negosasyon sa peace talks tali sa Iran ug Estados Unidos.
Isip tubag sa mga pamahayag ni U.S. President Donald Trump, gipaniguro ni Ghalibaf nga ang hulga ni Trump walay epekto sa mga Iranian ug dili sila mosurender tungod sa mga hulga.
Sumala sa taho sa mga Iranian outlets, miingon Ghalibaf nga andam ang Iran nga motubag sa bisan unsang pasidaan sa Amerika: “if you fight, we will fight, if you come forward with logic, we will respond with logic.”
Dugang pa niya, dili magpaubos ang Iran sa bisan unsang matang sa pagpanghadlok ug kon sulayan pag-usab ang ilang determinasyon, tudloan nila og mas dako pa nga leksyon ang US.
Gihisgotan usab ni Ghalibaf nga sukad pa sa sinugdanan sa negosasyon, wala na’y pagsalig ang Tehran sa Estados Unidos ug kinahanglan kini nga trabahuhon sa Amerika tungod sa mga nahitabong pag-atake sa Iran samtang gipahigayon ang negosasyon.
Human niini, miingon si Trump sa iyang mga post sa Truth Social nga magpatuman ang Estados Unidos og naval blockade sa Strait of Hormuz ug babagan ang mga barko nga nagbayad sa giingong “illegal toll” ngadto sa Iran.
Matud pa niya, padayon usab nga limpyohan sa U.S. ang mga pantalan sa Strait of Hormuz aron maseguro ang luwas nga pag-agi sa mga kaalyado nga barko niini.
Una na usab nga miingon ang militar sa U.S. nga andam sila nga mopahigayon og operasyon batok sa Iran sa saktong panahon, samtang nagpabiling walay kasabutan ang isigka-habig kalabot sa nuclear program sa Iran.
Photo courtesy: Al Jazeera
