Gipa-ubsan sa Asian Development Bank (ADB) ang ilang forecast sa paglambo sa Pilipinas alang sa tuig 2026 ngadto sa 4.4%, taliwala sa nagkagrabe nga kawalay kasiguroan tungod sa gubat sa Middle East.
Sa ilang report nga Asian Development Outlook (ADO) sa Abril 2026, ang nagpautang nga institusyon nga nagbase sa Pilipinas nipaubos sa projection sa gross domestic product (GDP) growth sa nasod ngadto sa 4.4%, gikan sa 5.3% nga forecast niadtong Disyembre. Ubos kini sa target ranges sa gobyerno nga 5-6% alang sa 2026, apan parehas sa kapaspason sa paglambo sa miaging tuig. Niadtong 2025, ang ekonomiya sa Pilipinas nilambo lamang og 4.4%, ang pinakahinay sulod sa lima ka tuig sukad niadtong 2020 diin niusos ang GDP og 9.5%.
Alang sa tuig 2027, nakita sa ADB nga mosaka ang GDP ngadto sa 5.5%, base sa pangagpas nga mogaan na ang presyur sa inflation. Matod ni ADB Senior Economics Officer Teresa B. Mendoza, nagpabiling hinay ang paglambo, samtang nag-atubang ang nasod og dagkong hagit gikan sa nagpadayong panagbangi sa Middle East. Tungod kay nagsalig pag-ayo ang Pilipinas sa imported nga lana, ang shock sa presyo sa lana sa kalibutan daling nideritso sa ekonomiya.
Gilauman sa ADB nga ang paglambo sa Pilipinas magagikan sa domestic demand ug investment, apan mahimo kining mapugngan sa nagkataas nga presyo sa mga palitonon. Sa miaging bulan, ang Bangko Sentral ng Pilipinas (BSP) nipabilin sa ilang benchmark rate sa 4.25% sa usa ka off-cycle meeting aron pakalmahon ang merkado tungod sa kabalaka sa gubat tali sa US ug Iran.
Photo courtesy: Asian Develoment Bank
