Na-rescue sa animal welfare group sa United Kingdom ang kapin 250 ka iro gikan sa usa ka balay, usa ka kaso nga nakapadismaya sa publiko ug nakapahinabo pa og mga sayop nga pagtuo nga ang hulagway generated pinaagi sa artificial intelligence.
Sumala sa Royal Society for the Prevention of Cruelty to Animals (RSPCA), ang mga iro nga poodle-cross breed nadiskubre sa usa ka pribadong balay sa wala gibutyag nga lokasyon niini.
Sa maong operasyon, 87 ka iro ang nakuha sa RSPCA, samtang ang uban gibalhin sa laing organisasyon nga Dogs Trust.
Giingon sa RSPCA nga ang kaso maoy usa lamang sa nagkadaghan nga insidente diin daghang mga hayop makit-an sa usa ka panimalay. Niadtong miaging tuig, nakatubag sila og 4,200 ka kaso nga adunay kapin sa 10 ka hayop sa usa ka address, nga misaka og 70% sukad 2021.
Sumala sa RSPCA, ang maong mga kaso kasagarang konektado sa problema sa mental health, pagtaas sa cost of living, ug dili kontroladong pagbreeding sa mga hayop.
Gipatin-aw usab sa organisasyon nga ang viral nga hulagway tinuod ug dili AI-generated, bisan pa sa kalibog sa publiko tungod sa grabeng kahimtang sa mga iro nga makita nga naghuot sa usa ka guba-on nga sala.
Gipahimangnoan sa RSPCA nga bisan pa og lisod tuohan, kini mao ang “reality” sa ilang frontline rescue operations ug usa ka pahimangno sa posibleng epekto sa sobra nga pagbuhi o pagpasagad sa daghang hayop sa usa ka lugar.
Photo Courtesy: The Telegraph
