Nasikop sa usa ka buy-bust operation ang usa ka indibidwal nga gilakip sa Top Priority List sa kapulisan sa Digos City, Davao del Sur niadtong nakalabay nga adlaw.
Gipahigayon ang operasyon sa Purok Bayanihan 1, Barangay Kapatagan, diin nadakpan ang suspek nga giila nga si alyas “Chan2x,” 29-anyos ug residente sa nahisgutang barangay.
Gipangunahan sa PDEU ug PIU ubos sa pagdumala ni PLTCOL Mark Abril Janolino, uban sa City Drug Enforcement Unit nga gi-supervise ni PLTCOL Norman L. Yparraguirre ang operasyon. Narekober gikan sa suspek ang mokabat sa 21.5 gramos nga gituohang shabu nga nagkantidad og Php146,200.
Gidayeg ni PLTCOL Yparraguirre ang maayong koordinasyon sa mga operatiba ug giingong padayon ang ilang paningkamot aron mapadayon ang kalinaw ug kahapsay sa komunidad.
Sa pagkakaron, anaa na sa kustodiya sa kapulisan ang suspek ug mag-atubang og kaso tungod sa paglapas sa Republic Act No. 9165.
