Ipatuman sa Department of Transportation (DOTr) ang dugang nga 20% fare discount alang sa mga commuters sa tibuok nasud sugod karong Abril 15 ubos sa Service Contracting Program.
Matod ni Acting Transportation Secretary Giovanni Lopez, kining diskwento i-patong sa kasamtangang 20% discount alang sa mga estudyante, senior citizens, ug PWDs, hinungdan nga mahimong moabot sa 40% ang kinatibuk-ang bawas sa pamasahi sa mga rota nga sakop sa programa, sama sa EDSA Busway.
Gilauman nga moabot sa 823 ka mga rota ug 50,000 ka mga PUVs ang mo-serbisyo sa kapin 15 ka milyong pasahero matag adlaw pinaagi niini nga inisyatiba.
Gipasabot ni Lopez nga ang maong lakang nagtumong dili lang sa pagpagaan sa gasto sa mga pasahero, kondili sa pagsiguro usab nga adunay stable nga kita ang mga drivers ug operators bisan pa man sa pag-ubos sa pamasahe.
Samtang, giangkon sa ahensya nga ang 1 bilyon ka pesos nga pondo mahimong mahurot sulod lang sa duha hangtod tulo ka semana, hinungdan nga nangayo na og dugang 5 bilyon ka pesos gikan sa DBM aron molungtad ang programa hangtod sa Hulyo.
Photo Courtesy:DOTr
