Gipadayag ni Reynaldo Roque, head sa Housing and Development Office sa Iligan City, nga padayon ang ilang programa sa pagtukod og permanenteng puy-anan alang sa mga pamilya nga naapektohan sa kalamidad sama sa Bagyong Basyang.
Kini ang iyang gibutyag human mahinabi sa Juander Radyo Iligan News team. Sumala kaniya, duha ka lugar karon ang gitutokan—ang Upper Hinaplanon ug Barangay Mandulog—diin nagpadayon na ang konstruksyon sa mga permanent shelter.
Gilauman usab nga makadugang pa og 100 ka yunit pinaagi sa tabang sa nasyonal nga ahensya ug pribadong sektor, samtang giandam usab ang ubang lugar sama sa Dalipuga ug Tuburan kung kinahanglanon pa og dugang kapasidad.
Gipasabot ni Roque nga ang programa alayon sa ordinansa sa syudad, diin prayoridad ang mga rehistradong botante sa Iligan ug kadtong mga balay nga totally damaged.
Apil sa requirements ang sertipikasyon gikan sa DSWD ug COMELEC aron makasulod sa listahan sa mga benepisyaryo. Bisan pa sa kakulang sa pondo, naningkamot ang lokal nga gobyerno pinaagi sa pakigtambayayong sa pribadong developers aron mapadayon ang mga proyekto ug matubag ang panginahanglan sa mga informal settlers.
Gitumbok sa buhatan nga ang ilang misyon mao ang paghatag og luwas ug permanente nga kapuy-an samtang ang bisyon nagtinguha sa pagpalambo sa kalidad sa kinabuhi sa katawhan pinaagi sa hustong puy-anan ug panginabuhian.
Giawhag usab ang tanang interesadong Iliganon nga moduol sa opisina ug mosumite sa gikinahanglang dokumento aron maapil sa programa sa dakbayan.
