Padayon karon ang gihimong operasyon sa Malungon Municipal Police Station (MPS) sa pagpatuman sa curfew hours alang sa mga menor de-edad sa tibuok lungsod sa Malungon, Sarangani Province.
Kini nga inisyatibo nagtumong sa pagsiguro sa kaluwasan ug kaayohan sa mga batan-on, ingon man ang pagkunhod sa mga insidente sa paglapas sa balaod diin malambigit ang kabatan-onan.
Pinaagi niini, mas mapanalipdan ang mga menor de-edad gikan sa bisan unsang posibleng peligro nga mahitabo atol sa mga kalihokan sa lawom nga kagabhion.
Ang maong pagpatuman sa curfew hugot nga gipasukad sa Ordinansa sa Curfew sa Munisipalidad sa Malungon ug nahiuyon usab sa “Safer Cities Initiative” sa Department of the Interior and Local Government (DILG).
Pinaagi niini nga mga kamanduan, gitinguha sa kagamhanan nga mahimong mas luwas ug malinawon ang komunidad alang sa tanang molupyo, ilabi na sa mga kabataan.
Tungod niini, nagpagula og opisyal nga panawagan ang lokal nga kapulisan ngadto sa tanang mga ginikanan ug mga guardian nga makigtambayayong sa maong lakang.
Gihangyo ang ilang aktibong kooperasyon pinaagi sa pagsiguro nga ang ilang mga anak mosunod sa gitakdang oras sa curfew nga alas 9:00 sa gabie hangtod 4:00 sa buntag gikan sa Lunes hangtud Dominggo aron malikay sa bisan unsang kasamok o disgrasya.
Ang maong kooperasyon giila nga dako og tabang sa pagpadayon sa kahusay ug kalinaw sa tibuok lungsod sa Malungon.
Photo Courtesy: PCR Malungon MPS
