Gipatuman sa Cotabato City Police Office ang public advisory nga bawal ang mag-inom og ilimnong makahubog sa kadalanan ug uban pang kalapasan alang sa kalinaw sa publiko sa dakbayan sa Cotabato.
Subay sa abiso, hugot nga gidili ang pag-inom og ilimnong makahubog sa mga pampublikong lugar lakip na sa kadalanan.
Diin gibawal usab ang paggawas sa kadalanan nga nakahukas o walay sinina isip kabahin sa pagmintinar sa disiplina ug kahapsay.
Dugang pa, ipatuman usab ang mga oras sa curfew alang lamang sa mga menor de edad gikan sa alas 10:00 sa gabie hantod sa alas 4:00 sa kaadlawon. Lakip usab sa implementasyon ang pag-obserbar sa quiet hours diin gidili ang videoke ug uban pang saba nga mga kalihukan gikan sa alas 10:00 sa gabii.
Giawhag sa kapulisan ang publiko nga sundon ang gipatuman nga mga ordinansa aron malikayan ang mga kalapasan ug mamentinar ang kahapsay sa Cotabato City.
