Nagkasabot ang Iran ug Amerika alang sa duha ka semana nga conditional ceasefire ug ang pag-abli balik sa Strait of Hormuz.
Gikumpirma sa Pakistan, nga nagsilbing mediator, ang kasabutan ug giimbitahan ang Iran ug US nga mopahigayon og dayalogo sa Islamabad karong Biyernes, Abril 10, aron makab-ot ang usa ka conclusive agreement alang sa paghusay sa tanang panagbangi.
Sumala ni Pakistan Prime Minister Shehbaz Sharif, gipatuman dayon ang ceasefire pipila ka minuto sa wala pa mapaso ang deadline nga gitakda ni US President Donald Trump.
Base sa taho sa Iran state media, nimando ang bag-ong Supreme Leader sa Iran sa tanang military units nga hunungon ang mga pag-atake.
“Dili pa kini ang katapusan sa gubat apan ang tanang sanga sa militar kinahanglan mosunod sa sugo sa Supreme Leader ug mohunong sa pagpabuto.”
Sa 10-point plan sa Iran, misugot matod pa ang US nga seguradong dili na masubli ang agresyon batok sa Iran, ang padayong pagdumala sa Iran sa Strait of Hormuz, ang pagdawat sa uranium enrichment, ug ang pagtangtang sa tanang primary ug secondary sanctions batok sa Iran.
Lakip usab sa kasabutan ang pag-terminate sa tanang resolusyon sa UN Security Council ug International Atomic Energy Agency, ang pagbayad og kompensasyon sa Iran, ang pag-atras sa mga combat forces sa US gikan sa rehiyon, ug ang paghunong sa giyera sa tanang fronts sa Iran lakip na ang Islamic resistance sa Lebanon.
Photo courtesy: Bangla News
