Misaka og 23 porsyento ang importasyon sa karne sa Pilipinas sa unang duha ka bulan sa tuig, diin niabot kini sa 292,105 metric tons (MT) base sa datos gikan sa Bureau of Animal Industry (BAI). Bisan pa man sa pasalig sa kagamhanan nga igo ang lokal nga suplay, ang mga negosyante padayon nga nagpuno sa ilang imbentaryo gikan sa gawas sa nasod. Ang Brazil gihapon ang nag-unang tinubdan sa karne, nga naglangkob sa halos katunga sa kinatibuk-ang importasyon, gisundan sa United States ug Spain.
Karne sa baboy (pork) gihapon ang labing dako og volume nga niabot sa 151,788 MT, samtang ang manok misaka usab og 28 porsyento ngadto sa 98,926 MT. Ang kadaghanan sa gi-import nga manok, mechanically deboned meat (MDM) nga gigamit alang sa mga processed food sama sa hotdog ug canned goods. Gawas niini, nitala usab og pagsaka ang importasyon sa baka ug kabaw aron seguradong matubag ang panginahanglan sa merkado.
Taliwala niining pagsaka sa suplay, adunay kabalaka sa posibleng pagmahal sa presyo sa karne tungod sa nagkataas nga presyo sa lana sa kalibutanong merkado. Gipahayag sa Department of Agriculture nga kon moabot og $200 matag bariles ang krudo, mahimong mosaka ang presyo sa liempo ngadto sa kapin ₱580 matag kilo. Apan, gihupay ni Agriculture Secretary Francisco Tiu Laurel kini nga kahadlok pinaagi sa pag-ingon nga ang banabana base lamang sa grabeng sitwasyon ug andam ang gobyerno sa paghimo og mga lakang aron dili kini mahitabo.
Photo coutesy: Pacific Customs Brokers
