Nasakmit sa Bureau of Customs (BOC) ang mga wala ma-deklarar nga pharmaceutical products nga nagkantidad og kapin PHP33 milyon gikan sa China sa Manila International Container Port, sumala sa ahensya adlaw niadtong nakalabay nga adlaw.
Matod ni Customs Commissioner Ariel Nepomuceno, ang shipment una nga gideklarar nga naglangkob og 1,144 ka pet cages, apan sa dihang gi-inspeksyon, nadiskobrehan ang daghang wala ideklarar nga mga tambal. Nakaplagan sa mga kawani sa Customs ang nagkalain-laing produkto nga walay permit gikan sa Food and Drug Administration (FDA), diin lakip ang 330 ka kahon sa pharmaceutical products nga nagkantidad og kapin PHP33 milyon.
Gawas niini, nadiskobrehan usab ang 400 ka kahon sa ubang mga produkto sama sa electronics, cosmetics, automotive parts, hardware ug lain-laing accessories nga nagkantidad og PHP19.69 milyon.
Giingon ni Nepomuceno nga dili tugotan sa gobyerno ang illegal nga kalakalan nga makadaot sa kaluwasan sa katawhan ug sa ekonomiya.
Gipasalig usab niya nga papanubagon ang tanang responsable sa pagpangsmuggle sa ilegal nga mga produkto.
Sa laing bahin, giingon ni MICP District Collector Felipe Geoffrey de Vera nga magpadayon ang pantalan sa hugot nga pagbantay sa utlanan. Mitambong usab sa inspeksyon ang mga opisyal gikan sa FDA ug mga representante sa pharmaceutical firm nga UNILAB Inc.
Photo courtesy : New Project Tracker
