Gipahibalo sa Provincial Government sa Surigao del Sur nga ang selebrasyon sa ika-66 nga Araw ng Surigao del Sur pagahimoon sa mas simple nga paagi tungod sa kasamtangang energy crisis, panginahanglan sa energy conservation, ug sa pagkahimutang sa nasud sa State of National Energy Emergency.
Sumala sa pahibalo, imbes sa naandan nga engrande nga kasaulogan, ipahigayon na lamang ang selebrasyon sulod sa duha hangtod tulo ka adlaw nga mas pinasimple nga programa.
Lakip sa mga aktibidad nga ipatuman mao ang thanksgiving mass, usa ka mubo nga commemorative program isip paghandum sa foundation day sa probinsya, ug ang pagpatuman sa mga mandatory nga kalihokan subay sa balaod sama sa Republic Act No. 10176 pinaagi sa tree planting ug uban pang makahuluganon nga inisyatiba.
Gipatin-aw usab nga imbes sa mga dagkong kalihokan sa kagabhion, ibubo ang pondo ngadto sa mga essential services sama sa medical missions, service caravans, ug community outreach programs aron mas mapaduol ang serbisyo sa gobyerno ngadto sa katawhan.
Bisan sa mas simpleng selebrasyon, giingon sa provincial government nga nagpabilin ang espiritu sa Araw ng Surigao del Sur pinaagi sa pagkahiusa, panaghiusa, ug dedikasyon sa pag-alagad sa katawhan.
Photo Courtesy: Provincial Government sa Surigao del Sur
