Usa ka kusog nga linog nga adunay 7.4 magnitude ang mitay-og sa sidlakang bahin sa Indonesia, nga miresulta sa kamatayon sa usa ka tawo ug kadaot sa pipila ka estruktura.
Sumala sa US Geological Survey, ang linog natala sa giladmon nga 35 kilometros sa Molucca Sea tali sa mga isla sa Sulawesi ug Maluku.
Gikatahong namatay ang biktima human matabunan sa naguba nga building sa lungsod sa Manado. Aduna usab usa ka nasamdan sa maong insidente.
Human sa linog, mipagawas og tsunami warning ang Pacific Tsunami Warning Center, apan kini gibawi human sa pipila ka oras sa dihang mikunhod na ang hulga.
Natala ang mga balod nga miabot hangtod 75 sentimetros sa pipila ka dapit, samtang adunay 11 ka aftershocks nga nisunod, lakip ang pinakakusog nga adunay magnitude nga 5.5.
Photo Courtesy: UPI
