Gipahibalo sa nasod sa Pakistan nga mahimo nang libre alang sa publiko ang state-run public transport sa kabisera niini nga Islamabad ug sa pinakadaghang tawo probinsya sa nasod sulod sa usa ka bulan. Kini nga lakang gihimo human nisaka ang presyo sa gasolina tungod sa nagpadayong gubat sa Middle East.
Narekord ang 42.7 porsyento nga pagtaas sa presyo sa petrolyo nga niabot na sa 485 rupees ($1.74) matag litro, hinungdan sa mga protesta ug taas nga linya sa mga gasolinahan.
Tungod niini, nisaad si Pakistan Prime Minister Shehbaz Sharif nga pakunhoran ang presyo ngadto sa 378 rupees matag litro sulod sa labing menos usa ka bulan. Samtang ang presyo sa diesel magpabilin sa 520 rupees matag litro human usab nisaka og 54.9 porsyento.
Matod ni Interior Minister Mohsin Naqvi, magsugod ang libreng transportasyon karong Sabado diin mogasto ang kagamhanan og 350 milyones ka rupees. Gawas sa libreng sakay, nagpatuman usab og “targeted subsidies” ang probinsya sa Punjab ug Sindh alang sa mga truck, bus, ug gagmayng mag-uuma.
Isip kabahin sa austerity measures, gipatuman usab sa nasod ang upat ka adlaw nga workweek sa pipila ka opisina sa gobyerno, paglugway sa school holidays, ug pagpahigayon og online classes.
Photo Courtesy: Views Bangladesh
