Giklaro sa Malacañang nga wala gitalikdan sa gobyerno ang imbestigasyon sa mga giingong anomalya sa flood control projects ug padayon gihapon kini.
Sumala kang Palace Press Officer Claire Castro, nagpadayon ang administrasyon sa kampanya batok sa korapsyon ug walay natulog sa pag-imbestiga sa maong isyu. Gibasura usab niya ang mga alegasyon nga napasagdan na ang problema.
Gipahayag niya nga ang Independent Commission for Infrastructure (ICI) nakahuman na sa ilang tahas isip fact-finding body ug nakasumite na sa ilang report ngadto sa Office of the Ombudsman ug Department of Justice (DOJ) alang sa dugang imbestigasyon ug posibleng pagsaka og kaso.
Dugang pa, daghang kaso karon ang gidumala sa Ombudsman ug DOJ, ug gipasalig sa Palasyo nga ang tanang aksyon ibase sa lig-on nga ebidensya ug walay mapili sa pagpanubag.
Photo Courtesy: PNA
