Hugot nga gibantayan sa Philippine National Police (PNP) ang seguridad sa mga energy facilities human sa deklarasyon sa national energy emergency.
Sumala kang PNP Chief General Jose Melencio Nartatez Jr., naka-focus ang PNP sa pagsiguro sa kaluwasan sa mga energy facilities, lakip na ang pagdugang og personnel nga i-deploy sa mga importanteng lugar aron malikayan ang posibleng kagubot tungod sa sitwasyon.
Matod pa ni Nartatez, padayon usab nga ipahimutang ang presensya sa kapulisan sa mga gas station ug energy plants aron masiguro nga dili malangan ang suplay.
Gipaniguro usab ni Nartatez nga magpabiling masaligan ang kapulisan 24 oras bisan pa sa energy emergency, diin apil sa ilang mga lakang ang paggamit og backup power systems sa mga estasyon.
Dugang pa niya, palig-onon usab ang night patrols sa mga apektadong komunidad aron malikayan ang posibleng krimen tungod sa posibleng brownout.
Samtang, nagpahimangno usab ang PNP sa publiko nga magpabiling alerto ilabina sa gabii kung adunay brownout, siguruhon nga pirming sirado ang mga pultahan, ug likayan ang pagbilin og kandila nga walay nagbantay.
Photo Courtesy: Philippine News Agency
