Samaran ang usa ka 57-anyos nga lalaki human gidunggab sa 52-anyos nga suspetsadong lalaki nga nahitabo sa may Barangay Magahis, Margosatubig, Zamboanga del Sur, niadtong nakalabay nga adlaw.
Ang maong mga biktima ug suspetsado pulos mga residente sa nahisgutan nga barangay. Sa inisyal nga imbestigasyon, bag-o lang nahidangat ang biktima gikan sa Barangay Poblacion sa dihang siya gi-atubang sa suspetsado gumikan sa pagpaningil sa wala nabayri nga utang.
Nahimong mainiton ang ilang panaglalis hangtod nga miresulta sa pagpangdunggab sa suspetsado ngadto sa biktima kausa sa likod nga bahin gamit ang sundang.
Dali nga gidala sa mga nagpakabanang silingan ang biktima sa Margosatubig Regional Hospital aron kini madapatan sa dinaliang medikasyon.
Samtang mipahigayon dayon og hot pursuit operation ang mga otoridad nga misangpot sa pagdakop sa suspetsado sa iyang pinuy-anan. Narekober usab ang 19 inches nga sundang nga gituohang gigamit sa krimen.
Ang suspek karon anaa na sa kustodiya sa Margosatubig Municipal Police Station alang sa pagpasaka sa angay nga kaso.
Photo Courtesy: Caymanian Times
