Gilauman nga magpadala ang Pentagon og dugang liboan ka sundalo gikan sa elite nga 82nd Airborne Division paingon sa Middle East, sumala sa mga report, samtang nagpadayon ang tensyon ug panagsangka tali sa Estados Unidos ug Iran. Matod sa mga tinubdan, mokabat sa 3,000 hangtod 4,000 ka sundalo ang posibleng i-deploy aron mapalig-on ang presensya sa militar sa Amerika sa rehiyon.
Bisan pa niini, padayon gihapon nga gibutyag ni Donald Trump nga abli kini sa negosasyon uban sa Iran alang sa usa ka ceasefire. Wala pa matino kung asa eksaktong dapit ipadala ang mga tropa, apan giingon nga tumong niini ang pagpalapad sa kapasidad sa U.S. alang sa posibleng operasyon militar.
Sa pagkakaron, gibanabana nga mokabat na sa 50,000 ka tropang Amerikano ang anaa sa Middle East. Nauna nang nagpadala ang U.S. og dugang pwersa, lakip ang mga Marines ug mga barkong pang-gubat sama sa USS Boxer.
Bisan pa niini, nagpadayon ang opensiba sa U.S. ug giingong nakaigo na sa libuang target sulod sa Iran ug sa pinakabag-ong datos, 13 ka sundalong Amerikano ang namatay samtang hapit 300 ang nanga-angol.
Samtang nagkadako ang tensyon, nagpabilin nga hagit alang sa administrasyon ni Trump ang kakulang sa suporta gikan sa publiko, sumala sa survey nga nagpakita nga mas daghan ang mosupak kumpara sa mosuporta sa kampanyang militar batok sa Iran.
Photo Courtesy: The Independent
