Nakadani og atensyon sa social media ang istorya sa pito ka iro nga gikawat apan nakahimo og pag-ikyas gikan sa trak ug nakapauli human magbaklay og kapin 17 kilometro sulod sa halos duha ka adlaw.
Sumala sa mga impormasyon, human sila maka-ikyaas, wala magbulag ang mga iro ug nagpadayon sa paglakaw sa mga highway ug bakanteng lote aron makabalik sa ilang mga panimalay.
Gibutyag nga usa ka gamay nga corgi ang nanguna sa grupo ug nagsilbing giya sa dalan, samtang ang mas dagkong mga iro nagbantay sa usa nila ka kauban nga nagluya na ang kahimtang aron dili kini mabiyaan sa ilang paglakaw.
Matod pa sa pipila ka residente sa lugar, magkaila na daan ang mga iro bisan pa sa wala pa sila gikawat. Tungod niini, gituohan nga mas sayon alang kanila ang pagtinabangay ug pagpabiling magkuyog hangtod makauli ang tibuok grupo.
Tungod sa pagkaylap sa ilang istorya sa social media, natud-an ang ilang nahimutangan ug sa ulahi naluwas sila. Luwas ug anaa na sa maayong kahimtang ang tanang iro sa dihang nabalik sila sa ilang mga fur parents.
Giisip ang maong panghitabo sa daghang netizens nga usa ka pananglitan sa pagtinabangay ug lig-on nga panaghiusa bisan sa mga hayop nga anaa taliwala sa peligro.
Photo Courtesy: Youtube
