Nahimong balaod ang balaudnon nga naghatag ug gahom sa presidente aron pagsuspenso sa excise tax sa lana, human gipirmahan ni Presidente Ferdinand Marcos Jr. ang Republic Act No. 12316.
Ubos sa balaod, ang presidente gihatagan og emergency powers sa pagsuspenso o pagkunhod sa excise tax sa mga produktong petrolyo, base sa rekomendasyon sa Development Budget Coordination Committee (DBCC) ug sa pakig-alayon sa Kalihim sa Department of Energy.
Mahimong gamiton kini nga gahom kon ang presyo sa krudo sa internasyonal nga merkado moabot o molapas sa 80 dolyares matag baril sulod sa usa ka buwan.
Sumala sa balaod, ang pagsuspenso o pagkunhod sa buhis mahimong ipatuman sa mga partikular nga produktong petrolyo. Mahimo usab kining ipatuman isip full suspension o partial reduction sa excise tax, depende sa kasamtangang kahimtang sa ekonomiya ug presyo sa lana. Giklaro usab nga dili molapas sa tulo ka buwan sulod sa usa ka tuig ang pagpatuman sa suspension o pagkunhod sa excise tax.
Kabahin kini sa mga lakang sa gobyerno aron maminusan ang epekto sa padayong pagsaka sa presyo sa lana sa mga lungsuranon, labi na sa plitehan, presyo sa palaliton, ug gasto sa transportasyon.
Photo Courtesy: PCO
