Gipahibalo ang “No to Oil Price Hike Coalition” kagahapon Lunes nga mopahigayon sila og nationwide transport strike karong Marso 26 ug 27, 2026. Ang maong koalisyon gilangkuban sa nagkadaiyang pundok sa transportasyon sama sa mga drayber sa jeepney ug motorcycle taxi. Giisip nga kritikal ang panahon sa maong duha ka adlaw nga welga tungod kay gilauman nga daghang mga Pilipino ang mopauli sa ilang mga probinsya alang sa pagsaulog sa Semana Santa.
Sa pikas bahin, gipatin-aw sa Malacañang nga ang Pilipinas wala makasinati og “oil crisis” kundi usa lamang ka “price disruption” o pagkabalda sa presyo sa lana. Sumala ni Communications Undersecretary Claire Castro, dili pa matawag nga krisis ang sitwasyon tungod kay aduna pa may igong suplay sa lana sa nasud ug ang presyo lamang ang adunay isyu tungod sa nahitabong tensyon sa Middle East.
Gipahinumdom usab sa palasyo nga ubos sa Oil Deregulation Law, ang mga lokal nga kompanya sa lana nagbaligya base sa presyo sa global market, hinungdan nga dili direktang makadiktar ang Department of Energy (DOE) sa presyo sa gasolina.
Bisan pa man sa pag-ingon nga walay krisis, gipadayag sa Malacañang nga gina-finalize na sa pagkakaron ang paghimo og usa ka “crisis management committee” ubos sa kamanduan ni Pangulong Marcos Jr.
Kini nga komite maoy motutok sa mga kinahanglanon sa katawhan, ilabi na sa pagsiguro nga dili maputol ang suplay sa lana sa nasud. Samtang nagpaabot sa maong kamanduan, gipaneguro sa gobyerno nga gihimo nila ang tanan aron mamenosan ang epekto sa kakuwang sa suplay ug ang nagpadayong pag-usab sa presyo sa lana sa tibuok kalibutan.
Photo Courtesy: MSN
