Gipahigayon ang 22nd Women with Disabilities Celebration uban ang Medical Mission isip kabahin sa pagsaulog sa National Women’s Month sa ZSBPPO Covered Court karong adlawa Marso 24,2026. Gitambongan kini sa nagkadaiyang kababayen-an nga adunay kapansanan, uban sa mga lokal nga opisyal ug partner organizations nga nagpakita sa ilang suporta sa adbokasiya sa gender equality ug inclusivity.
Tumong sa maong kalihokan ang paghatag og pagtagad ug pagpasidungog sa kontribusyon sa kababayen-an nga adunay kapansanan sa komunidad. Gipasiugda usab niini ang kahinungdanon sa patas nga oportunidad, access sa serbisyo, ug proteksyon sa ilang katungod isip kabahin sa mas lapad nga katilingban.
Kabahin sa aktibidad ang usa ka medical mission nga naghatag og libre nga serbisyo sama sa general check-up, konsultasyon, ug uban pang panglawas nga panginahanglan sa mga benepisyaryo. Daghang residente ang nakabenepisyo niini, ilabi na ang mga adunay limitadong access sa health services.
Sumala sa mga tigpasiugda, padayon ang ilang paningkamot sa pagpalambo sa kahimtang sa kababayen-an pinaagi sa mga programang inklusibo ug mapuslanon. Naglaom usab sila nga pinaagi sa maong selebrasyon, mas mapalig-on ang panaghiusa ug pagrespeto sa katungod sa tanang kababayen-an sa komunidad.
Photo Courtesy: Instagram
