Misuporta ang Makabayan bloc sa panawagan ngadto ni Ferdinand Marcos Jr. nga balibaran ang plano sa pagtukod og US-backed ammunition factory sa nasod.
Sumala sa grupo, posible kining makadala og peligro sa seguridad sa Pilipinas ug mahimong makadani sa nasod nga maapil sa mga kagubot nga may kalabutan sa Estados Unidos.
Gipahayag sa mga magbabalaod nga sila Antonio Tinio, Sarah Elago, ug Renee Co nga dili angay himuon nga economic program ang paghimo og bala ug armas samtang nag-atubang ang katawhan sa taas nga presyo sa lana, kuryente, pamasahe ug pagkaon.
Matod pa nila, mahimong “target ug bodega sa bala” ang Pilipinas kung matuman ang plano.
Una nang nagkasabot ang Estados Unidos ug mga kaalyado niini sa ilawom sa Partnership for Indo-Pacific Industrial Resilience nga pagatun-an ang posibilidad sa pagtukod og pasilidad sa Pilipinas alang sa paghimo sa 30-millimeter cannon rounds nga gigamit sa military aircraft ug ground vehicles.
Sa pagkakaron, anaa pa sa sa pagtuon ug pagplano ang level sa maong proyekto.
Photo Courtesy: alamy
