Hugot nga gipaspasan karon sa Land Transportation Franchising and Regulatory Board (LTFRB) Region 10 ang pag apod-apod sa fuel subsidy aron matabangan ang mga drayber nga apektado sa krisis sa lana.
Sumala ni LTFRB-10 Regional Director Aljo Bendijo sa pakighinabi sa Juander Radyo Malaybalay, ang maong ayuda ihatag ngadto sa mga drayber sa Public Utility Jeepney (PUJ) nga makadawat og ₱1,500 pinaagi sa programang AICS. Lakip usab sa makadawat niini mao ang mga drayber sa bus, taxi, UVE Express, ug mga multicap basta adunay aktibong prangkisa.
Samtang ang mga tricycle drayber, giklaro nga ubos na sa pagdumala sa ilang tagsa-tagsa ka Local Government Units (LGUs) ang ilang madawat nga ayuda.
Gipahinumdoman ang mga drayber sa mosunod nga mga deadline:• Marso 25: Deadline sa pagsumite o pag-validate sa listahan sa mga benepisyaryo.• Marso 31: Deadline sa pag-apod-apod sa subsidy pinaagi sa Landbank o GCash.
Naghangyo usab ang LTFRB sa mga residente sa Bukidnon nga motabang sa pag-monitor ug pag-report sa ilang Facebook page kon kinsang mga transport companies ang miapil sa welga aron mahatagan og dinaliang aksyon.
Gipasabot sa ahensya nga ang plano alang sa fare hike o pagsaka sa pletehan “suspendido” pa sa pagkakaron samtang gitun-an pa kini og maayo sa gobyerno, apan andam na ang ilang “matrix” kon pananglitan kini aprobahan na.
