Dakong kadaogan ang naangkon ni Phel Salmasan, usa ka lokal nga artist gikan sa Cabanglasan ug sakop sa tribung Umayamnon, human niya makuha ang kampeonato ug ₱100,000 nga cash prize sa labing unang Soil Painting Competition gipahigayon sa Bukidnon Center for Culture and the Arts sa Barangay Laguitas, dakbayan sa Malaybalay, niadtong nakalabay nga adlaw.
Sa pakighinabi sa Juander Radyo Malaybalay, gipadayag ni Salmasan nga ang iyang talagsaong obra adunay gidak-on nga 4 by 8 feet. Imbes pintura, yuta ang iyang gigamit, usa ka talagsaong pamaagi nga nakapadayeg pag-ayo sa mga hurado. Ang maong kompetisyon gilusad aron ipasiugda ang Bukidnon isip “Soil Painting Capital of the World” ug ipakita sa kalibutan ang talagsaong talento sa mga local artist.
Gibutyag usab niya nga ang iyang inspirasyon naggikan sa iyang kinabuhi sa umahan, diin ang mais maoy sentro sa iyang obra. Iyang gihulagway ang iyang kaugalingon kaniadto isip usa ka “Manghagdaway”—o tigtigom og salin nga mais—nga nahimong simbolo sa kalig-on ug pagpaningkamot sa mga lumad. Sulod sa duha ka semana, iyang namugna ang usa ka obra maestra nga naghatag kaniya og kadungganan.
Matod pa niya, ang yuta, bisan sa kasimple niini, usa ka gamhanang materyal sa paghimo og makahuluganon ug dekalidad nga arte.
Isip pahimangno sa mga batan-ong artist, hugot niyang giingon nga dili angay kahadlokan ang kapildihan. Iyang gipasiugda nga ang kapakyasan kabahin lamang sa dalan padulong sa kalampusan, ug ang pag-undang dili gayod solusyon. Giawhag usab niya ang tanang taga-Bukidnon nga ipakita ug ipasigarbo ang ilang talento aron mas mailhan pa ang probinsya sa tibuok kalibutan.
