Nagpagawas og seryosong hulga si US President Donald Trump batok sa Iran diin gihatagan niya ang Tehran og duha ka adlaw aron ablihan pagbalik ang Strait of Hormuz o pulbuson sa Amerika ang ilang mga planta sa kuryente.
Sa iyang post sa Truth Social, gipasiugda ni Trump nga dugmokon sa militar sa Amerika ang mga power grid sa Iran, sugod sa pinakadako, kung dili hingpit nga tugotan ang pag-agi sa mga barko sulod sa 48 ka oras.
Kini nga tensyon naggumikan sa de facto blockade sa Iran sa Hormuz, diin moagi ang 20 porsyento sa lana sa tibuok kalibutan, hinungdan nga misaka ang presyo niini ngadto sa kapin sa $100 matag bariles.
Isip balos, nagpahimangno ang militar sa Iran nga targeton usab nila ang mga energy ug desalination infrastructure sa Amerika sa rehiyon kung idayon ni Trump ang iyang hulga.
Bisan pa sa pagsaka sa presyo sa krudo ug mga palaliton, gipakaminos ni Trump ang estratehikong bili sa Strait of Hormuz ngadto sa US ug nag-ingon nga ang taas nga presyo sa lana usa lamang ka “gamay nga sakripisyo” alang sa seguridad sa kalibutan.
Sa ikatulo nga semana sa gubat nga gilunsad sa US ug Israel, niabot na sa kapin sa 1,500 ang nangamatay sa bahin sa Iran samtang 13 usab sa mga sundalong Amerikano.
Photo courtesy: The New York Times
