Mopahigayon og nationwide transport holiday karong adlawa, Lunes, Marso 23, 2026, ang Alliance of Concerned Transport Organizations (ACTO) ug uban pang transport groups isip protesta sa dakong pagsaka sa presyo sa mga produktong petrolyo.
Sumala ni Libay de Luna, presidente sa ACTO, dili na nila makaya. Busa karong adlawa, mag-transport holiday sila nationwide isip tubag sa sunod-sunod nga pagsaka sa presyo sa gasolina ug diesel nga naghatag og kalisod sa mga tsuper ug operator.
Base sa pinakaulahing datos, misaka og hangtod sa Php23.90 matag litro ang diesel ug Php16.60 matag litro ang gasolina karong semanaha, gumikan sa tensyon sa Middle East nga nakaapekto sa suplay sa lana sa tibuok kalibutan.
Tungod niini, gilauman nga maapektuhan ang biyahe sa mga jeepney, UV Express, ug mga modernized transport units sa Metro Manila, Northern Mindanao, ug Iloilo City, diin nakaandam ang kapin sa 50 ka mga transport cooperatives nga makiusa sa hunong-pasada.
Gawas sa protesta batok sa oil price hike, gihisgutan usab sa ACTO nga dili igo ang fuel subsidy ug dismayado sila sa pagkalangan sa Php2 fare hike nga unta ipatuman na karong Marso.
Samtang, gitun-an na sa administrasyon ni Presidente Ferdinand Marcos Jr. ang paghatag og gahum sa Presidente nga suspensuhon ang excise tax sa petrolyo aron maminusan ang epekto sa mahal nga presyo sa lana.
Photo courtesy: Daily Tribune
