Lima ka indibidwal ang namatay human sa banggaan sa usa ka sedan ug pick-up truck sa main B1 highway sa Namibia niadtong Huwebes sa gabii, sumala sa lokal nga media report adlaw nga Biyernes.
Ang tanan nga biktima gikatahong mga pasahero sa sedan, samtang ang drayber sa pick-up truck nakasinati og grabeng kadaot, base sa usa ka taho.
Sumala sa imbestigasyon, ang duha ka sakyanan nasunog human sa banggaan nga nahitabo sa Otjozondjupa Region sa sentral nga bahin sa nasud. Tungod sa kakusog sa impact ug sunog, lisod na mailhan ang pipila sa mga biktima.
Gipangayo sa mga awtoridad ang kooperasyon sa publiko, ilabina sa mga adunay paryente nga nagbiyahe gikan sa Windhoek paingon sa Otjiwarongo ug wala pa makaabot sa ilang destinasyon. Giawhag sila nga dayong mokontak sa kapulisan aron matabangan ang pag-ila sa mga namatay.
Padayon pa ang imbestigasyon sa hinungdan sa maong aksidente samtang nagpadayon usab ang panawagan sa mga opisyal alang sa mas higpit nga pag-amping sa dalan aron malikayan ang susamang trahedya.
Photo Courtesy: The Namibian
