Giimbestigahan na karun sa Cateel Municipal Police Station ubos sa pagpanguna ni PMAJ MICHAEL P CELECIO, Acting Chief of Police, ang nakaplagan nga nagkatag nga mga karton sa gituohang smuggled nga sigarilyo sa baybayon sa Barangay Poblacion, Cateel, Davao Oriental karung adlawa, Marso 20, 2026.
Matod pa ni Barangay Kagawad Aldrin Castro sa Barangay Poblacion, iyang namatikdan ang mga kontrabando sayo sa buntag ug gilayon kini niyang gireport sa Philippine Coast Guard ug sa Cateel Municipal Police Station.
Makita sa mga litrato ang nagkalain-laing debris nga gituohang gikan sa usa ka fishing vessel, nga posibleng konektado sa maong insidente.
Sa kasamtangan, padayon ang imbestigasyon sa kapulisan aron matuki ang tinood nga gigikanan sa maong mga kontrabando ug ang posibleng mga responsable niini.
